BUTUAN CITY – Malampuson ang pag-implimentar sa search warrant may kalapasan sa Republic Act 9165 kagahapon sa alas 5:30 sa hapon sa may Phase 2 Blk 4 Lot 28, Horizon Subdivision, Brgy San Vicente, Butuan City diin na-aresto ang usa ka mekaniko human usab nakuha ang daghang mga sachet sa gidudahang shabu.
Gihimo ang operasyon sa lead unit nga PNP Drug Enforcement Group kon PDEG Special Operations Unit -13 kauban ang Philippine Drug Enforcement Agency kon PDEA-Agusan Del Norte og Butuan City Police Station 1.
Nadakpan sa operasyon si Ruel Manla Remotigue alyas “Laway” 36-anyos, olitawo, usa ka mekaniko nga residente sa maong dapit.
Nakumpiska sa operasyon ang pito ka sachet sa gitoohang shabu nga gibana-banang mitimbang sa 25 gramos og mikantidad ug 170-mil pesos.
Lakip sa gikumpiska ang nagkadaiyang drug paraphernalia, og usa ka unit sa airsoft rifle nga dunay magazine og scope.
Nasayran nga ang Search Warrant No. 2023-03-27-01 gi-isyu kini ni Hon. Isah J Echem-Tangonan, Presiding Judge sa Branch 33, 10th Judicial Region, RTC, Butuan City.
Ang na-arestong suspek og ang mga narekober nga ebidensiya gikustudiya kini sa PNP Drug Enforcement Group kon PDEG Special Operations Unit -13 alang sa dokumentasyon og tukmang disposasyon.
