BUTUAN CITY – Nag-panic ang katawhan sa nagkada-iyang lugar sa Davao Region human mitay-og ang magnitude 6 nga linog pasado alas-6:44 kagabii.
Base sa earthquake bulletin nga gipagawas sa Philippine Institute of Volcanology and Seismology, nasigpatan ang sentro sa pagtay-og sa sidlakang bahin sa lungsod sa Compostela sa Davao de Oro nga duna’y giladmong 28-kilometros ug tectonic ang gigikanan.
Ubay-ubay na nga mga aftershocks ang mitay -og kondiin ang pinakakusog natala pasado 11:23 kagabii nga mi-abot sa magnitude 4.4. Nasubay kini sa Balut Island sa lungsod sa Sarangani, Davao Occidental.
Nasayrang nagmugna kini og panic sa katawhan sa tibuok Davao Region kondiin tungod sa kakusog, daghang tinda ilabina sa mga imnunon ang nadamyos, nanggawas ang mga estudyanteng duna’y klase sa gabii apil na ang mga anaa sa mga ospital kondiin wala na panumbalinga pa ang ulan, makaplastar lang sa mga hawan.
Samtang duna usa’y mga residente sa coastal areas nga nanaka sa habog nga lugar sa kahadlok nga mumugna kini og tsunami human namatikdan ang pag-atras sa dagat.
Padayon pang gipanubayan sa nagkada-iyang local Disaster Risk Reduction and Management Councils sa mgaapektadong lugar ang damyos nga posibleng hatud sa kusog nga linog.
