BUTUAN CITY – Padayon ang imbestigasyon sa ginsakpan sa Butuan City Police Station 1 aron ma-establisar ang motibo sa pagpusil-patay sa ilang ka-ubanan sa trabaho ngadto sa magti-ayon pasado alas-otso kagabi sa may Princess 1 Subdivision sa Purok 6, Brgy. Villa Kananga ning siyudad sa Butuan.
Na-ila ang mga biktimang sila Mary Ann Añasco, 51-anyos ug 45-anyos nga bana niining si Charlie samtang ang suspek nga silingan ra usab sa mga biktima, nailang si POlice Senior Master Sergeant (PSMS) Darwin Plaza Nolasco, nadestino sa Dinagat Municipal Police Station sa lalawigan sa Dinagat Islands.
Sa eksklusibong pakighinabi sa Bombo Radyo Butuan, gipadayag ni Police Executive Master Sergeant (PEMS) Rey Garielle Maderal, tigpamaba sa Butuan City Police Station 1, nga base sa ilang imbestigasyon, karelasyon matud pa sa asawa sa suspek ang biktimang lalaki.
Kasong double murder ang ipasaka sa kapulisan batuk sa suspek nga boluntaryong mitahan human sa kremin bitbit ang 9mm nga kalibreng pistola nga gigamit niini sa pagpamusil.
