BUTUAN CITY – Mukabat sa kapin 98-mil ka mga elementary pupils ingon man junior ug senior high school students ning dakbayan sa Butuan ug kapin 4,300 ka mga teaching ug non-teaching personnel ang apektado sa pagsuspende sa klase ug trabaho sa Department of Education kon DepEd-Butuan City Division.
Sa eksklusibong pakighinabi sa Bombo Radyo, gipadayag ni DepEd-Butuan City Schools Division Superintendent Dr. Marilou Dedumo, nga bisan og alas-siete na sa buntag nila opisyal nga gipagawas ang class suspension apan discretion na gihapon sa mga school administrators ang pagsuspende sa klase sa ilang tunghaan depende sa ilang assessment sa baha palibot sa ilang tunghaan apil sa posibleng landslides nga matigayon kung anaa kilid sa bukid ang ilang tunghaan tungod kay sila ang suhito sa ilang area.
Bisan matud pa og wala pa’y orange rainfall warning nga gi-isyu ang Philippine Atmospheric, Geophysical and Astronomical Services Administration kon PAGASA, apan tungod sa pagbaha na sa palibot sa mga tunghaan ning siyudad, rason nga gisuspende nila ang klase.
Nangayo usab og dispensa ni Dr. Dedumo sa medyo ulahi na og dyutay nga deklarasyon gumikan kay naghulat usab siya sa deklarasyon sa lokal nga kagamhanan alang sa work suspension.
Dungan niini iyang giklaro nga kinahanglang pro-active na ang mga school heads sa ingon niini nga panahon ug dili na maghulat pa sa opisyal nga deklarasyon sa class suspension tungod kay sila matud pa ang nahusito sa ilang lugar.
