BUTUAN CITY – I-assess na karong adlawa sa mga opisyal sa Ministry of Communication and Aviation sa Honiara, Solomon Islands ang damyos nga natala sa bag-o ug karaang terminal buildings sa Honiara International Airport human ang pag-igo sa 7.3-magnitude nga linog kagahapon.
Sa eksklusibong interview sa Bombo Radyo Butuan, gipadayag ni Bombo international correspondent Julius Laud Villones, project worker sa maong tugpahanan, nahugmak ang acoustic board ceiling sa airport rason nga pipila ka mga pasahero ang nadatugan apan minor injuries lang ang ilang na-angkon.
Wala’y angayang ikabalaka usab sa mga ka-ubanan niyang Pinoy tungod kay accounted silang tanan.
Samtang gikumpirma ni Bombo international correspondent Myrtle Atienza, presidente sa Filipino-Community sa Solomon Islands nga sa pagkakaron, wala pa sila’y nadawat nga impormasyong duna’y Pinoy nga nadamay sa 7.3 magnitude nga linog nga mitay-og duol sa south-west region sa Malango partikular sa capital Honiara.
Sa eksklusibong pakighinabi sa Bombo Radyo Butuan, gipadayag ni Atienza nga buntag -oras sa maong nasud, mitay-og ang kusog nga linog rason nga ang mga trabahante sama kaniya nga naag-opisina, gipapa-uli gilayon.
Samtang gipadayag usab ni Bombo international correspondent Ann Jeannette Umali, kinsa usa ka magtutudlo sa maong nasud ug secretary sa Filipino community, gipagawas gilayon nila ang mga bata gikan sa classrooms ug gipasundo sa ilang mg ginikanan tungod sa padayong mga aftershocks.
Base usab sa iyang nakuhang impormasyon, na-angol ang mag-inahang mitabok sa kalsada human nabanggaan sa sakyanan kansang driver posibleng naratol na usab.
Samtang napugos pagsira ang Mall Point Cruz sa Honiara sa Solomon Islands human ang pagtay-og tungod sa nangatagak nga mga tile walls.
Sa pagsaysay ni Bombo international correspondent Tony, gipadayag niining gipagawas gilayon sila sa tag-iya sa parking lot ug human og head count kanila, gipapa-uli gilayon sila isip protocol sa ingon niini nga panghitabo alang sa ilang kaluwasan.
