BUTUAN CITY – Duna na’y existing policy ang Department of Education kalabot sa pagdili na pagpamaligya og mga junk foods ingon man sweetened drinks sulod sa mga school premises tungod kay makadaut kini sa kabataan.
Gikumpirma kini ni Department of Education-Caraga spokesperson Pedro Tecson dungan sa pagbutyag nga niadto pang tuig 2005 nila kini gipatuman base na usab sa Department of Education Order NO. 14 series of 2005.
Sa maong kamanduan, gilatid nga ang tugutang mabaligya diha sa school canteens ug school premises mao kadtong juice nga gama sa gulay ug prutas kondiin taliwa nga silent sa maong kamanduan ang pagdili sa mga sweetened beverages, apan klarong dili kini apil sa gitugutang mabaligya.
Gisundan kini sa kamanduang gipagawas niadtong tuig 2017 diin gi-categorize na sa ahensya ang mga angayang ibaligya.
Apan giklaro sa opisyal nga welcome gihapon alang kanila kung mas palig-unon pa kini sa mamugna unya nga balaud. Kini tungod kay ang nasangpit nga palisiya, mas nakatutok man sa mga pampublikong tunghaan.
Kung duna na matud pa’y balaud alang niini, ma-apil na unya sa ban sa mga junk foods ug sweetened drinks ang mga pribadong tunghaan.
