BUTUAN CITY – Gikumpirma ni Dindo Abellanosa, Regional Information Officer sa Philippine Drug Enforcement Agency kon PDEA-Caraga nga miabot sa 8,219,712.00 ang kantidad sa shabu nga nakuha sa buybust operasyon Purok 1, Brgy. Mabua, Surigao City, Surigao del Norte sa nakalabay nga adlaw.
Nasayrang mitimbang sa 1,027.464 gramos ang nakumpiskang shabu samtang na-aresto usab ang 4 ka indibidwal nga sila Jayson Tumbaga kansa Regional Target-Listed Drug Personality nga residente sa Purok 2, Brgy. Taligaman, Butuan City; Emma Grace Junior nga taga Barangay JP Rizal, Butuan City; Roche Cutamora residente sa Barangay Ampayon, Butuan kansa ang pulos nagpositibo sa drug test samtang ang ikaupat si Rupert Joan Tumbaga nga taga Barangay Antongalon, Butuan City.
Lakip sa nakumpiska sa otoridad ang duha ka pakete nga dunay sulod sa pinaugang dahon sa marijuana nga balor usa ka libo ka pesos, usa ka unit sa 9mm caliber pistol nga dunay magazine og 10 ka buhing bala, 3 ka cellphones, kwarta nga balor 22,900 pesos, 29 ka tag-usa ka libo nga boodle money, marked money nga usa ka libo ka pesos, og usa ka unit sa motorcycle Z900.
Sumala pa ni Abellanosa nga kanhe nang napriso niadtong 2016 ang nadakpan nga si Tumbaga apan nakagawas tungod sa dismissal sa kaso niadtong 2019.
Ang entiro rehiyon sa Caraga matud pa ang operasyon ni Tumbaga diin ang source sa iyang ilegal nga drugas gikan sa Lanao Area. Sa karun, andam nang esang-at ang kasong may kalapasan sa Section 5, 11, og 12, Article II sa RA 9165 batuk sa mga suspetsado ngadto sa Office of the City Prosecutor sa Surigao City.
Tungod sa pinaka-ulahing malampusong operasyon, gipahibalo ni Abellanosa nga ang PDEA-Caraga ang Top 1 sa tibook Pilipinas alang sa unang semester ning kasamtangang tuig.
