BUTUAN CITY – Padayon pa ang imbestigasyon sa ginsakpan sa Butuan City Police Station kon BCPS3 aron ma-ilhan ang responsable ug masuta ang motibo sa pagpusil-patay sa Sangguniang Kabataan kon SK chairman sa Brgy. Lumbocan ning siyudad pasdo alas-9:45 kagabii.
Naila ang biktimang si Nelbert Gacosta, 27-anyos, ulitawo ug residente sa Purok 11 sa maong barangay. Migawas sa pag-imbestiga ni PMajor Dores Aguhob nga duna’y lima ka mga samad-pinusilan sa iyang likod ang biktima kinsa gidala pa sa Agusan del Norte Provincial Hospital.
Apan pag-abot sa alas-10:07 sa gabii, gideklara na kining patay ni Dr Anthony Francis Medillo.
Sa eksklusibong pakighinabi sa Bombo Radyo Butuan, gipadayag ni Lumbocan Kapitan Shirley Reyes nga gipusil ang biktima human sa gipasi-ugdahan niining dula sa basketball sa ilang barangay kagabii.
Adiser matud pa ang maong hitabo, usa sa ilang barangay tanod nga nagbantay sa dula ang nagbutyag nga usa ka lalaki ang miduol kaniya ug daling mibiya dihang duna’y mitawag sa iyang cellphone. Pagka-alas dies sa gabii, nakadawat na siya og tawag kalabot sa pagpusil kang Gacosta sa highway sa may Purok 7, Brgy. Masao. Gidala pa sa ospital ang biktima apan nakabsan gihapon kini sa iyang kinabuhi.
