BUTUAN CITY – Gi-alegahan ni Atty. Noel Catre Jr., ang gitahasang nanguna sa transition team ni incoming Surigao Del Norte Governor Lyndon Barbers, nga dunay dili maayong gihimo ang kadumalahan ni Outgoing Governor Lalo Matugas.
Kini human nila nasayran nga dunay mga deed of donations ang kadumalahan niini diin gipangdonar ang mga sakyanan, computer, og kayutaan nga gipanag-iyahan sa provincial government.
Gi-donar matud pa kini ngadto sa mga munisipyo kansa ang mayor kabanay ra usab sa pamilya Matugas.
Susama na lang matud pa sa pumpboat ambulance nga gidonar ngadto sa usa sa munisipyo sa Siargao Island. Gihimo matud pa nila ang donasyon bisan og wala nag-request niini ang mga nakadawat nga munisipyo.
Kini bisan pa man sa pagpagawas og circular memorandum number 22-056 sa Department of Interior and Local Government kon DILG ngadto sa outgoing Governor Lalo Matugas ug sa tanang department heads. Gimanduan ang mga niini nga isubmite ngadto sa transition team ang imbentaryo sa tanang propiedad, dokumento og kagamitan.
Apan sumala pa ni Atty. Catre, nangayu ang mga kasamtangang administrasyon og lugway sa pagsubmite sa imbentaryo.
Alayon niini gibutyag ni Atty. Catre nga bahala na ang DILG sa nasangpit nga panghitabo tungod kay sa ila man gikan ang circular memorandum.
