BUTUAN CITY – Nagtingkagol pagbalik sa prisuhan ang usa ka olitawo human kini subling nasikop sa gikasang buy-bust operation kagahapon sa alas 3:00 sa hapon sa P-1, Barangay Rajah Soliman, Butuan City.
Naila ang suspetsado nga si Joseph Torralba Perez alias Bingle, 36-anyos nga residente sa P-3, Brgy. Datu Silongan, Butuan City. Gihimo ang operasyon sa mga ginsakpan sa Butuan City Police Station 1 ug Philippine Drug Enforcement Agency kon PDEA 13 nga miresulta sa pagkakumpiska sa 7 ka mga dagkong sachet sa gidudahang shabu nga mitimbang og 107 gramos og mikantidad sa 727-mil ka pesos.
Lakip usab sa nakumpiska ang mga illegal drug paraphernalia, personal nga gamit og ang usa ka libo ka pesos nga nagsilbing buy-bust money, tulo ka peke nga tag-usa ka libo, cash nga kapin sa 6-mil pesos, og ang single motor. Nag-atubang ang suspek og kasong may kalapasan sa Republic Act No. 9165 o Comprehensive Dangerous Drugs Act of 2002.
Base sa taho gikan sa Butuan City Police Office, ang na-arestong suspetsado kanhe nang napriso niadtong 2011 tungod sa susamang kalapasan. Ang nadakpan gikustudiya kini karun sa BCPS-1 alang sa tukmang disposasyon.
