BUTUAN CITY – Giklaro sa nagpa-ilang si Ka Leo de Guerro, tigpamaba sa New People’s Army kon NPA-Surigao del Norte nga wala’y natigayong engkwentro kagahapong adlawa tali nila ug sa militar ug kapulisan nga miresponde human ang ilang pagsunog sa tag-usa ka yunit pay loader ug dump truck ni Alegria, Surigao del Norte konsehal Reuel Jalasan didto sa Brgy. San Pedro.
Gipadayag kini ni Ka Leo sa eksklusibong pakighinabi sa Bombo Radyo Butuan, nga human nila nasunog ang maong ekwipo, dali gilayong misibat ang ilang mga ka-uban kondiin nakaresponde matud pa ang mga goons sa konsehal apil na si Ernesto Andojar nga taga-Brgy. Baan Riverside ning siyudad.
Sunod usab matud pang nakaresponde ang militar ug kapulisan kondiin sa layo pa lang, nadunggan na nilang duna’y mga buto-buto sa armas sa dapit nga nahitabuan rason nga ila kining gibaslan ug ulahi nang nasayran nga mga sakop diay kadto ni Jalasan kinsa mudagan pagka-mayor sa maong lungsod.
Dinhi na gibarugan ni Ka Leo nga ang miresponding tropa sa gobyerno ang nakapatay kang Andojar kinsa gi-alegahan nilang bag-ong hired nga goon sa konsehal.
Gikondena sa National Intelligence Coordinating Agency kon NICA-Caraga ang pagsunog sa mga rebeldeng New People’s Army kon NPA sa duha ka mga heavy equipment nga gipanag-iyahan sa konsehal sa Alegria, Surigao del Norte kondiin duna pa’y construction worker niining napatay.
Madumdumang nahitabo ang pagsunog sa dump truck ug pay loader kagahapon sa alas-11:30 sa buntag kondiin na-engkwentro pa sa maong grupo ang miresponding mga otoridad.
Human niini, napalgan nang wala’y kinabuhi si Ernesto Andojar, 44-anyos, olitawo nga taga Purok-16, Barangay Baanriverside ning siyudad sa Butuan.
Sa Eksklusibong pakighinabi sa Bombo Radyo Butuan, gipadayag ni NICA-Caraga spokesperson JC Solomon nga wala na magkadimao sa ilang depensa ang walhong grupo tungod kay una na matud pang gi-angkon ni Ka Leo de Guerro sa usa ka lain nga interview nga sila ang responsable sa duha ka hitabo.
Ang gihimo matud pa sa mga rebelde nagpakita lang sa ilang kaberdugo ug kawala’y pu-angod nga mupatay na lang og tawo ug manunog pa og kagamitan aron lang makuha ang ilang demand gikan sa tag-iya sa maong mga ekwipo nga si Alegria mayoral candidate, incumbent Sangguniang Bayan kon SB member Reuel Jalasan.
