BUTUAN CITY – Wala’y media coverage nga gihimo sa Australia kalabot sa gi-obserba nga Earth Hour gikan sa alas-8:30 ngadto na sa alas-9:30 kagabii taliwa nga sa maong nasud nagsumikad ang selebrasyon niini.
Gikumpirma kini ni Bombo international correspondent Denmark Suede sa eksklusibong pakighinabi sa Bombo Radyo Butuan direkta gikan sa Sydney, Australia.
Gibutyag ni Suede nga natawo ang maong ideya sa maong nasud niadtong tuig 2004 pinaagi sa World Wildlife Fund kon WWF Australia isip ilang silent protest batuk sa climate change.
Pag-abot sa tuig 2006, dinhi unang gihimo ang pagpatay sa sugang dagitabnon nga nasundan pa pagkasunod tuig diin mi-apil na siya niini ug wala sila magdahom nga mahimo kining global movement human nga nasundan pa kini sa tuig 2008 kondiin 35 ka mga nasud na ang misalmot.
Kagabii, duna’y nga dagkong landmarks sa maong nasud nga nagpatay sa ilang suga apil na niini ang Sydney Opera House ug uban pang establisamiento kondiin kini bountaryo lang.
Gitu-uhan ni Suede nga usa sa mga hinungdan nga wala kaayo mu-klik ang paagi sa pag-obserba sa Earth Hour mao ang mga pagsaway nga naani niini gumikan kay duna matud pa’y laing paagi sa pag-obserba niini.
Apil sa angayan matud pang huna-hunaon ang alternatibong tuburan sa kuryente nga dili lang coal tungod kay mas daghan matud pa ang namatay niini kumpara sa nuclear power plant.
Sa Australia, kapin sa 60-porsiento sa tuburan sa ilang enerhiya gikan sa coal ug wala’y gikan sa nuclear power plant tungod kay bawal kini sa maong nasud hinuon ang uban gikuha gikan sa wind, solar, hydro power ug battery sources.
