BUTUAN CITY – Tumang kasubo ang gibati sa transport sector ning siyudad sa Butuan sa lain na usab nga hugna sa nag-ong-ong nga bigtime oil price hike ugmang adlawa nga mulapas sa 3-pesos matag-litro.
Sa eksklusibong pakighinabi sa Bombo Radyo Butuan, gipadayag ni Wilfredo Ybañez Jr., presidente sa Butuan United Tricycle Federation kon BUTF, nga wala pa gani sila ka-move on sa pinaka-ulahing pagsaka sa presyo sa lana ning mi-aging semana, dakdakan na usab sila og dakong usbaw sa presyo sa mga produktong petrolyo.
Pangitaan matud pa nila kini og paagi aron masayran kung unsa’y illang mahimong medyos ilabina nga ang ilang gidusong fare hike petition sa Sangguniang Panlungsod ning mi-aging semana, wala pa ma-aksyuni.
Mala-umon ang ilang grupo nga dunggon na sa nasudnong kagamhanan ang panawagan sa transport sector nga tangtangon na ang excise tax sa mga produktong petrolyo tungod kay mao kini ang nakapasamot pagsaka sa presyo sa maong mga produkto.
Gawas pa kini sa panghinaut usab nilang dunggon na ang ilang unang hangyo aron makasugakod usab sila sa ilang inadlaw nga panginahanglanon sa ingon dili ra mapadulong sa ilang abangan ang ilang kitaon.
Nanghinaut si Ybañez nga unta dili lang ang transport sector maoy pasagdan sa tanan nga manawagan alang sa pag-aksyon na sa nasudnong kagamhanan sa wala’y hunong nang pagsaka sa presyo sa lana kondili apil na ang tanang sektor sa katilingban.
Kini tungod kay ang tanan man ang ma-apektuhan tungod sa mahatag niining domino effect ilabina sa tanang mga palaliton.
Nanawagan siya sa tanang katawhan, adunahan man o mga ordinaryo nga maghi-usa sa panawagan sa gobyerno nga aksyunan na ang padayong pagsaka sa presyo sa mga produktong petrolyo.
