BUTUAN CITY – Gibana-banang mukabat sa 450-mil pesos nga kantidad sa gitu-uhang shabu ang nakumpiska sa mga otoridad sa gipahigayong drug buy-bust operation kaganinang alas-12:20 sa udto sulod mismo sa Toyota Avanza kilid sa national highway sa Purok 8, Brgy. Baan Km. 3 ning siyudad.
Nakuha gikan sa subject person nga si Rohmer Antonio Bas, residente sa Purok 1-A, Bry. 1, San Francisco, Agusan del Sur ang usa ka gamay nga sachet sa gidugang shabu nga gibana-banang mitimbang og 5-gramos ug nagkantidad og 50-mil pesos ingon man dakong sachet nga nagkantidad og 400-mil pesos human mitimbang og 50-gramos.
Apil sa nakuha sulod sa gimanehuang sakyanan sa suspek kinsa gibansagang high-value target tungod sa dinagko na niining transaksyon ang usa ka libo ka pesos nga marked money ug 49 ka buok nga tag-usa ka libo ka pesos na boodle money, uban sa mga illegal drug paraphernalia. Gi-andam na ang mga kinahanglanong dokumento alang a pagpasaka og tukmang kaso batuk sa suspek kinsa matud pa ka kanhi pulis nga na-AWOL ug kasamtangang driver sa ambulansya sa DO PLaza Memorial and Medical Center.
