BUTUAN CITY – Gipanghimakak ni Department of Transportation kon DOTr-Caraga OIC Regional Director Joel Consulta ang alegasyon kaniya nga duna siya’y pangayu-ong kwarta sa mga emission testing centers ug driving schools nga accredited sa Land Transpotation Office kon LTO ning syudad.
Sa eksklusibong pakighinabi sa Bombo Radyo Butuan, gipadayag ni Consulta nga wala gani matud pa siya masayud sa mga tag-iya sa driving schools ug kagahapon gipatawag niya sila sa iyang opisina tungod sa ilang mga nadawat nga reklamo kalabot sa dili matud pa patas nila nga singil sa mga driving schools kansa dili maayo.
Subay sa nadawat niyang reklamo, nagpalibot gilayon siya og usa ka tao nga konektado gihapon sa iyang buhatan aron i-verify ang kamatu-uran sa maong mga taho.
Gidugang pa ni Consulta, kung dautan pa ang iyang tuyo ngadto sa mga reklamante, dili niya himuon sa iyang opisina ang gika-ingong pagpangilkil apan tungod kay alang sa kaayuhan sa mga driving schools ug mga testing centers ang iyang tumong, rason nga didto niya sila gipatawag sa iyang buhatan aron dili mubati og kalain kaniya.
Taliwala sa maong isyu nga gisabwag batuk kaniya, gi-awhag niini ang mga tawong nalambigit sa ingun niini nga klase sa pagpalusot nga pasakaan sila og kaso aron mailhan ang kamatu-uran sa ilang mga alegasyon.
Gani maisugon nga gi-awhag niini ang tanang nag-alegar kaniya nga wala matud pa siya mahadlok sa mga nagpaluyo sa maong isyu aron lang siya mapakanaog sa iyang pwesto.
