BUTUAN CITY – Tungod sa nagtunhay karon nga low pressure area kon LPA, gimanduan na ni Surigao City Mayor Estong Matugas ang ilang response cluster nga magpahigayon na og rekoreda sa kabaranggayang anaa sa danger zones aron makalikay sa posibleng kadaut nga mahatud niini.
Nasayrang sa gipagawas nga weather advisory sa Philippine Atmospheric, Geophysical, Astronomical Services Administration kon PAGASA, dala sa LPA ang mga pag-ulan nga duna’y dalang igo-igong huros sa hangin.
Apil sa Response Cluster ang City Disaster Risk Reduction and Management Office sa pagpanguna ni Threlcie Villaces kauban ang mga personahe sa Bureau of Fire Protection, mga Navy Reservists ug mga barangay officials, kinsa gimanduan nga adto magrekoreda sa mga nanimuyo daplin sa dagat ug suba ingon man sa mga bakilid nga lugar nga maoy kasagarang bahaon ug mabiktima sa pagdahili sa yuta sa ingon niini nga panahon.
Padayon usab ang monitoring sa lokal nga kagamhanan sa lakat sa panahon samtang nagpadayon usab ang pagpanghatag og mga hinabang sa mga kabarangayan human ang paghapak sa bagyong Odette.
