BUTUAN CITY- Nagmalampuson ang unang adlaw sa gipatumang gun ban ning rehiyon human nakuhaan og deadly weapon ang usa ka indibidwal nga gikan sa Cabadbaran City sa may checkpoint subay sa unang adlaw sa pagpatuman sa COMELEC checkpoint.
Gibutyag ni Pol. Maj. Dorothy Tumulak ang tigpamaba sa Police Regional Office 13 sa eksklusibong pakighinabi sa Bombo Radyo Butuan, mag-atubang og tukmang kaso ang mga madakpang dunay dalang deadly weapon o kaha armas dungan sa gipatumang national gun ban.
Apan giklaro usab niini nga kung isurender ang deadly weapon, agi-an pa sa tag-iya ang saktong proseso base na sa argumento ug ebidensyang makita sa rason sa pagbitbit niini.
Padayong gipanawagan sa opisyal nga kung mahimo, dili na lang dalhon o i-transport ang mga armas o deadly weapon o ba kaha musulay sa pag-violate sa implementasyo sa COMELEC gun ban aron malikayan ang pag-atubang og kaso.
Gipahimangnuan usab ang publiko nga mosubay sa rules and regulations nga gi-establisar sa nasundong gobyerno ug sa Commission on Elections (COMELEC) aron mahimong hapsay ang dagan sa umalabot nga piniliay.
