BUTUAN CITY- Ubay-ubay ka mga lugar sa rehiyon sa Caraga region ang gipailalom sa tropical cyclone wind signal (TCWS) no. 3 samtang mikusog ang Bagyong Odette, matod sa PAGASA niadtong kagabii.
As of 11 pm weather bulletin, gibutyag sa PAGASA nga si Odette katapusang nasigpatan sa gilay-ong 470 km sa sidlakan sa Surigao City, Surigao del Norte nga dunay gikusgon sa hangin nga 140 kph duol sa sentro nga dunay 170 kph nga paghuros sa hangin samtang kini naglihok paingon sa kasadpan sa gikusgon nga 15 kph.
Ang bagyo aduna gihapoy kusog sa hangin nga moabot og 400 km gikan sa sentro niini.
Ang mga areas ilalom sa TCWS No 3 makasinati og destructive typhoon-force winds o gilauman sulod sa 18 ka oras mao ang:Dinagat Islands,Surigao del Norte,Northern portion sa Agusan del Norte (Tubay, Santiago, Jabonga, Kitcharao), ug northern portion sa Surigao del Sur (Carrascal, Cantilan, Madrid, Carmen, Lanuza, Cortes).
Sigon sa PAGASA nga gikan karung gabii makasinati og, kusog ngadto sa mas kusog nga pagbundak sa ulan ang Caraga, Misamis Oriental, Camiguin, Southern Leyte, ug Bohol, samtang hinay ngadto sa kusog nga ulan ang masinati-an sa Leyte, ang southern portion sa Eastern Samar, Leyte, Cebu, Siquijor, Negros Oriental, Zamboanga del Norte, Lanao del Sur, ug ubang bahin sa Northern Mindanao.
Samtang hinay ngadto sa igo lang nga pag ulan ang gibana-bana nga masinatian sa Bicol Region, Davao Oriental, Davao de Oro, Davao del Norte, ug ubang bahin sa Visayas, Zamboanga Peninsula, ug mainland Bangsamoro.
