BUTUAN CITY- Nagpaabot og pahisubo ang tropa sa 4th Infantry Divison Philippine Army ngadto sa pamilya ni Ka Oris human nga gihatod na kaganina ang abo niini sa katapusang pahulayan didto sa Surigao Memorial Park sa Surigao City.
Sa eksklusibong pakighinabi ning sibyahan gibutyag sa hepe sa Public Affairs Office sa 4ID Philippine Army Maj. Francisco Garello Jr nga pabilin gihapon silang nag-ampo nga mahiluna na sa hingpit ang kalag ni Ka Oris sa laing kalibutan.
Tungod sa kamatayon ni Ka Oris naglaum ang kasundaluhan nga mahimo na unya kining katapusang isyu sa walhong grupo nga makareyalisar sa kamatuoran.
Gani ubay-ubay na matud pa ang mitahan sa sabakan sa gobyerno human ang maong panghitabo sa pinakataas nga lider sa walhon grupo.
Sa karun nasiguro sa kasundaluhan nga wala na’y nahabiling aktibong myembro sa NPA o ba kaha regular nga rebelde human sa gihimo sa tropa sa gobyerno ang tanan aron mutahan ang mga niini.
Tungod sa maong panghitabo, gipanghinaut sa militar nga unta makita pa sa ubang myembro nga nahisalaag pa sa kamatuoran nga kini na matud pa ang saktong panahon aron mubalik na sa gobyerno ilabina nga taas pa ang panahon aron sila makakuha usab sa benipisyo nga gihanyag sa gobyerno ngadto sa mga gustong mutahan na sa tumong nga gusto ang malinawong panginabuhi ug hapsay nga pagpuyo kauban ang pamilya.
Tungod sa program sa gobyerno, ubay-ubay na usab ka mga surenderee sa walhong grupo ang nagbutyag nga wala matud pa sila masayup sa pagbalik diha sa gobyerno ilabina nga nakita matud pa sa mga niini kung gi-unsa pag respeto sa mga opisyal sa gobyerno ang katungod sa katawhan ug uban pa.
Tungod niini, giawhag ni Maj. Garello ang uban pang nagpabiling nagduha-duha sa pagbalik sa balaod nga unta himoon nilang sumbanan ang ilang mga kaniadto kauban diha sa walhong kalihukan kansa karun nakatagamtam na sa haruhay ug maayong pamuyo.
Giklaro usab ni Maj. Garello alayon sa mga black propaganda sa grupo ni Ka Oris kansa sigon matud pa sa tigpamaba sa maong grupo nga duna matud pa’y ligasiyang gibutang nga matuman lang alang sa rebolusyunaryo nga pakigbisog.
Apan alang sa tropang militar nga kini usa lamang matud pa ka pagpakusog sa ilang pagtoo aron mamintina ang ihap sa ilang myembro ilabina nga daghan na ang nakabaton nga walay paingnan ang ilang gisuportahan nga grupo.
