BUTUAN CITY- Girespondehan gilayon sa mga otoridad ang natigayong tensyon sa lungsod sa Tubay, Agusan del Norte human nga gipatawag ang mga botanteng rehistrado sa gihimong validation Commission on Elections (COMELEC).
Madumdumang gikatahong nangisog na mismo ang bise Mayor sa lungsod tungod sa panghitabo.
Gibutyag ni PCol. Martin Gamba Provincial Director sa buhatan sa Provincial Office sa Agusan del Norte sa eksklusibong pakighinabi sa Bombo Radyo Butuan nga nahitabo ang nasangpit nga tensyon sa adlawng Huwebes ug Byernes tungod na sa dili pa klarong gimontar nga checkpoint sa lugar nga bahin sa lungsod.
Nasayrang dili otorisado ang pagbabag sa dalan sa lungsod nga wala’y resolusyon gikan sa Inter Agency Task Force (IATF).
Samtang wala pa usab kumpirmasyon kung mando ba kini sa kagamhanan sa lungsod.
Gituohang dungan kini sa init nga away sa politika sa lungsod ilabina nga nagkaduol na ang piniliay sunod tuig.
Samtang nabalik ra sa kahapasay ang tensyon human nga girespondehan kini sa mga otoridad.
