BUTUAN CITY – Full blast na ang operasyon sa regional border control point nga gimontar sa Regional Task Force Against COVID-19-One Caraga Shield sa utlanan sa Agusan del Norte ug Misamis Oriental.
Giklaro kini ni Agusan del Norte police provincial director Col. Martin Gamba sa eksklusibong pakighinabi sa Bombo Radyo Butuan dungan sa pagbutyag nga subay kini sa padayon nilang pagplastar pa sa mga angayang ipatuman, base sa resolusyong gipagawas sa One Caraga Shield kagabii ug gipasa na ngadto sa ilang mga operating units.
Tungod niini, ang ilang temporaryong gihimo sukad niadtong Lunes base sa executive order gikan sa buhatan ni Governor Dale Corvera nga mangayo og exit pass ug barangay health certificate sa barangay nga ilang gigikanan, ang mga gustong mubiya sa ilang lugar, karon ma-usab na.
Ka-abag karon sa kapulisan sa pag-man sa mga border control points sa rehiyon ang nagkada-iyang ahensya sa gobyerno sama sa Bureau of Fire Protection, Philippine Coast Guard, Provincial Disaster Risk Reduction and Management Office kon PDRRMO, mga health workers ug uban pa.
Gipasabot ni Col. Gamba nga gituyo sa One Caraga Shield nga mu-abag sa control point ang mga personahe sa nagkada-iyang ahensya sa gobyerno aron kung duna’y mutumaw nga problema, duna’y mga personaheng mu-atiman kanila depende sa concern sa musangit sa maong checkpoint.
Sa pagkakaron, ang ila lang gihulatan nga ma-operationalize na ang paggamit sa QR code tungod kay dinhi man masayran ang paggawas sa usa ka indibidwal padulong gikan ning rehiyon padulong sa Cagayan de Oro City ug ubang lugar nga duna’y kaso sa Delta variant ug unsa siya kadugay sa dapit nga iyang adtuan.
Alang usab nilang mga Caraganons nga magpatambal sa maong siyudad, ang ila lang medical certificate maoy pangitaon diha sa control point.
