BUTUAN CITY – Magpatuman og duha ka adlaw nga lockdown ang Brgy. Culit, Nasipit, Agusan del Norte gikan sa bisperas ngadto na sa mismong adlaw sa ilang kapistahan karong Mayo 14 ug 15 kon adlaw’ng Biernes ug Sabado.
Sa eksklusibong pakighinabi sa Bombo Radyo Butuan, gipadayag ni Kapitan Joel Pepito nga sa alas-otso pa lang sa buntag karong Biernes, magmontar na sila og checkpoint nga duna’y pulis aron maoy mususi sa mga manulod sa maong barangay hangtud sa gabii.
Pagka-alas dies sa gabii sa Biernes ug Sabado hangtud sa buntag sa Dominggo, ang mga barangay tanod na usab ang magtuwaw sa checkpoint kondiin gawas pa kini sa mga mag-roving nga mga tanods aron mupatuman sa ilang curfew hours.
Gipasalig ni Kapitan Pepito nga wala’y taga-laing barangay ang makasulod sa Culit sa maong mga adlaw gawas lang niadtong mga construction workers nga nagtrabaho sa dalan padulong sa Brgy. Jaguimitan.
