BUTUAN CITY – Padayon pang gipangita sa ginsakpan sa Philippine Coast Guard ang 9 sa 20 ka mga tripolante sa misadsad nga Landing Craft Tank (LCT) Cebu Great Ocean didto sa Brgy. Cantapoy, Malimono, Surigao del Norte human nga una nang napalgan ang 4 ka mga patay na nilang ka-ubanan ug 7 ka mga survivors.
Sa eksklusibong pakighinabi sa Bombo Radyo Butuan, gipadayag ni PCG-Surigao del Norte ciommander Elaine Pangilinan, gidala na sa punerarya sa Surigao City ang mga namatay.
Naila usab ang mga survivors kinsa gidala na Malimono Regional Health Unit nga sila Noli Labucay kinsa na-rescue pasado alas-9:05 kagabii sa Barangay Cayawan, Malimono; Roger Polo (Chief Mate), Arjie Bacarra, ug Joejie Villanueva – kinsa nakaplagan sa Barangay Balite, San Francisco kaganinang alas 04:30 sa kaadlawon.
Anaa pa sila Felipe Quebuen – kinsa gitabangan sa nagpakabanang citizen kaganinang alas 06:19 sa buntag; John Renzo Guanzon kinsa nabangalan sa Malimono pasado alas-6:00 kaganinang buntag ug usa nga wala pa maila kinsa nakaplagan kaganinang alas-5:30 sa buntag sa Barangay Jubgan, San Francisco.
Samtang sa mga casualty mao sila Norman Galon kansa nakaplagan sa mga residente sa shoreline sa Barangay Balite, San Franciso; ug laing tulo nga wala pa maila kinsa nakaplagan sa baybayon sa Barangay Jubgan, San Francisco.
Sumala sa opisyal, nag-deploy na sila og land mobility vehicle nga maoy mo-conduct og patrol operations sa baybayon sa Malimono ug San Francisco, Surigao del Norte.
