BUTUAN CITY – Dugang mga kaso ang gi-atubang sa number 1 most wanted nga New People’s Army kon NPA member sa regional target list sa Caraga, human ang pag-serve sa mga warrants of arrest pasado alas-2:50 kagahapon sa hapon sa custodial facility sa Butuan City Police Station 1.
Mga kasong multiple attempted murder ug attempted murder nga duna’y pyansang tag-120 mil pesos matag-usa ang gi-atubang na usab karon ni Renalyn Gomez Tejero alyas Tiray ug Lyn.
Gi-isyu kini sa Regional Trial Court Branch 34 sa Agusan del Norte human kini gikutay sa pagpatay sa duha ka mga kanhi rebelde sa Surigao del Sur, ug pag-atake sa Alpha Company sa 29th Infantry Battalion, Philippine Army sa Brgy. Hinimbangan, Kitcharao, Agusan del Norte niadtong Pebrero 5, 2017 ug sa engkwentro batuk sa Scout Platoon sa 29IB, PA niadtong October 9, 2017 sa bukirang bahin sa Brgy. Mahayahay sa susamang lungsod.
Madumdumang naaresto si Tejero sa joint police-army operation sa Brgy. Lapasan, Cagayan de Oro City niadtong Dominggo Marso 21, base duha ka mga warrants of arrest sa kasong murder ug multiple attempted murder.
Nasayrang misalmot si Tejero sa underground movement sa NPA ug gikutay ngadto sa pipia ka mga kagubot nga gisabwag sa NPA.
