BUTUAN CITY – Halos mi-abot na sa atop sa pipila ka lugar sa Brgy. Quezon, Tandag City, lalawigan sa Surigao del Sur ang milanap nga tubig baha tungod sa padayong pag-ulan nga hatud sa bagyong Auring.
Sigon sa residenteng si Leah Caduyac sa eksklusibong pakighinabi sa Bombo Radyo Butuan, nagtagbo na matud pa ang tubig sa suba ug ang tubig sa dalan hinungdan sa pagsaka og maayo sa level sa tubig baha ilabina kadtong anaa nanimuyo dapit sa tulay.
Duna matud pa’y ubang mga residenteng wala’y nasalbar nga mga gamit tungod sa kapaspas sa pagsulod na sa tubig baha sa ilang kabalay gawas lamang niadtong dos-andanas ang mga balay kondiin ang uban anaa lang usab mipasilong sa ilang duol nga mga paryente.
Gani lakip matud pa ang ilang evacuation center gibahaan na hinugdan nga duna’y ubang pamilyang nagkatigom sa usa lang ka balay.
Hangtod sa pagkutlo niini nga balita, wala pay mi-abot nga mag-rescue kanila kondiin giobana-banang 20 ka mga balay matud pa ang nabahaan.
