BUTUAN CITY – Gitutukan karon sa lagal team sa pamilya sa gilugos-patay nga flight attendant nga si Christine Angelica ‘Ica’ Dacera ang pagpagawas na sa Makati City Prosecutor’s Office og dinali-ang resolusyon sa inquest proceedings aron mu-abante na ang kasong rape with homicide nga ilang ipasaka batuk sa onse ka mga responsable sa kremin.
Sa eksklusibong pakighinabi sa Bombo Radyo Philippines ngadto sa abogado sa pamilya Dacera, gibutyag ni Atty. Jose Ledda Jr., wala pa sila’y nadawat nga balita gikan sa mga tawong nalambigit sa maong kremin ilabina nga mihimo usab og mga lakang ang ilang pamilya aron sila protektahan.
Gibutyag niining sa onse ka mga suspek, 3 ngadto sa 4 kanila ang mga higala gyod sa biktima rason nga dihang nag- video call pa si Ica sa iyang inahan didto sa General Santos City, kampante kining anaa siya sa maayong kamot human nakita ang mga personal nga higala niini kinsa ka-ila na usab sa ilang pamilya.
Dugang pa ni Atty. Ledda, ang posisyon sa proseksuyon, mao nga nahimutang ang biktima sa posisyong dili niya angayang mahimutangan tungod kay angayan unta nga anaa siya uban sa iyang mga tinuod nga higala og dili sa mga dili niya ka-ila.
Wala na gidetalye pa ni Atty. Ledda ang dagan sa panghitabo apil na kung kinsa sa mga higala ni Ica ang nangimbitar og lain nilang higala nga dili ka-ila sa biktima sa rasong aduna na’y record niini ang prosecutor’s office ilabina nga duna’y mga kalambuan sa maong kaso matag karon ug unya.
Wala matud pa matago sa pamilya Dacera ang ilang kadismaya nga ang mga ka-ila nilang higala sa biktima, apil sa mga milugos-patay sa biktima tungod kay kung unta duna’y nakapanalipod niini, mipatim-aw na sila karon ug misulti sa tinuod nga dagan sa panghitabo ug kung kinsa ang tinuod nga mihimo sa maong ngilngig nga kremin.
