BUTUAN CITY – Nanghunaw ni Jezreen Cullamat, tigpamaba sa pamilya Cullamat, sa gipagawas nga pamahayag sa iyang inahang si Bayan Muna partylist Rep. Eufemia Cullamat, niadtong nagpatawag kini og press conference ug gidayeg ang paghalad sa kinabuhi sa iyang 22-anyos nga manghod nga si Jevilyn.
Sa iyang funeral speech, gipadayag ni Jezreen Cullamat nga kung unsa man ang gipagawas nga pamahayag sa ilang inahan human nakumpirmang namatay sa engkwentro ang iyang manghod, iya lang kini sa ilang inahan ug wala sila’y labot.
Ang nag-antus matud pa sa sakit nga panghitabo mao silang managsoon ug uban pang mga kabanay nga nakakita sa nadangatan sa iyang manghod.
Mi-apela usab kini sa tanan nga kung unsa man ang gibarugan karon sa ilang inahan, unta respetuhon na lang kini tungod kay angayan matud pang sabton ang bati-on sa usa ka inahan nga nawad-an sa iyang anak.
