BUTUAN CITY – Padayon pang gipangita ang hepe sa Bureau of Fire Protection kon BFP-San Jose sakop sa Dinagat Islands province human mitiklaob ang gisakyan niining bangka kagabii sa kadagatang sakop sa Surigao City.
Gi-ila ni Philippine Coast Guard kon PCG-Surigao del Norte commander Lawrence Roque ang na-missing nga si SFO1 Albie Amparo samtang naluwas usab ang ka-ubanan niining si FO1 Peter Greg Miranda ug ang operator sa bangka nga si Janjan Bulandrina.
Sa eksklusibong pakighinabi sa Bombo Radyo Butuan, gipadayag ni Commander Roque nga magpahatud unta sa lungsod sa San Jose sa Dinagat Islands ang duha ka mga bombero aron mubalik na sa ilang duty apan paglabay og usa ka oras human mibiya sa mainland Surigao pasado alas-sais kagabii, nasugat nila ang dagkong balud ug hangin nga posibleng dala sa bagyong Rolly hinungdan sa pagtikla-ob niini.
Naluwas ang bangka operator ug ang junior fireman sa kadagatan sa Talisay Island nga parte pa sa Surigao City ug gipadayon karon ang search and rescue operation sa na-missing nga opisyal.
