BUTUAN CITY – Mi-abot na sa 2,191 ang kinatibuk-ang kaso sa COVID-19 sa tibuok Caraga Region human nadugangan og 68 ka mga bag-ong kaso kaganina samtang walo ang bag-ong natalang patay.
Sa taho sa Department of Health-Center for Health and Development kon DOH-CHD Caraga, nasayran nga sa kinatibuk-ang ihap sa tibuok rehiyon, 1,351 na ang nakarekober, 744 ang mga aktibong kaso samtang 96 na ang patay.
Sa mga bag-ong kaso, tag-34 ang mga lalaki ug babaye kondiin 62-porsiento niini anaa sa edad nga 21 ngadto sa 50-anyos kondiin 14-anyos ang pinakabata samtang 83-anyos ang pinaka-edaran.
Apil sa mga duna’y bag-ong kaso ang lalawigan sa Agusan del Norte nga duna’y duha gikan sa mga lungsod sa Buenavista ug Santiago; 3 sa Cabadbaran City; 4 sa Agusan del Norte partikular sa mga lungsod sa Bunawan ug Sta. Josefa nga mitala og tag-duha; Bayugan City-2 nga pulos taga-Brgy. Taglatawan; 5 sa Surigao del Norte nga natala sa lungsod sa Malimono nga duna’y 2 samtang tag-usa sa Placer, Mainit ug Bacuag.
Mitala usab og duha ka kaso ang Surigao del Sur nga natala sa mga lungsod sa Barobo ug Tago; usa sa Bislig City; 17 sa Surigao City nga nabahin sa Brgy. Washington-4, tagtulo sa Brgy. Rizal; Cagniog; Luna ug Sabang samtang tag-usa na sa Brgy. Ipil, Lipata, San Juan ug Taft. Pinakadaghan ang natala sa Butuan City nga mi-abot sa 32 kansa nabahin sa Brgy. Libertad-7; Vill Kananga-4; tag-3 sa Brgy. Baan Km. 3 ug Pigdaulan; tagduha usab sa Brgy. Ambago, Bayanihan ug Dagohoy samtang tag-usa na sa Brgy. Imadejas, JP Rizal, Lapu-Lapu, Limaha, Mahay, Obrero, Pangabugan, Taguibo ug Tungao.
Apil sa mga lungsod nga napatyan og COVID-19 patients ang usa nga gikan sa lungsod sa Nasipit, Agusan del Norte ug pito ang gikan sa Surigao City.
