BUTUAN CITY – Mudslide ug dili landslide ang natigayon sa lungsod sa Marihatag, Surigao del Sur ning mi-aging alas-dos sa hapon nga miresulta sa pabiling pagka-missing sa unom ka mga minero human natabunan nga buhi.
Kini ang gikumpirma ni PLt. Noel Piong, OIC chief of police sa maong lungsod sa eksklusibong pakighinabi sa Bombo Radyo Butuan.
Sigon sa opisyal, diha mismo sa halos hubas-hubas na nga suba sa Brgy. Casting sa Brgy. Bayan sakop sa maong lungsod, nagkabot kon nag-treasure hunting ang maong mga minero kondiin gi-atangan nila kini og mga dagkong bato, kahoy ug yuta aron pugngan ang pag-agi sa tubig.
Apan tungod sa pipila ka adlaw nga pag-ulan ngfa hatud sa nagtunhay kaniadtong low pressure area nga anaa sa Surigao provinces, mibigay ang ilang gi-atang ug mibanlas ngadto sa gikabot nilang suba nga gibana-banang duna’y giladmong 30 ka tiil ng anasudlan na sa minero.
Nagbutang na ang lokal nga kagamhanan og back hoe sa dapit nga nahitabuan aron madali pagluwas ang mga minero apan nabalda ang operasyon tungod sa padayong pag-ulan.
Hangtud sa pagkutlo niini nga balita, wala pa’y bisan usa sa unom ka mga minero ang naluwas sa mga rescuers gikan sa ilawom sa yutang ilang gikabot apan mala-umon gihapon ang mga rescuers nga marekober pang buhi ang nasangpit nga mga minero.
Naila ang naluwas nga minero nga si Nonito de los Reyes samtang ang unom nga padayon pang gipangita mao sila Eduardo Ubas, Jerome Lucaberte, Menard de Jesus, Jonathan Ocson, Angelito Sicup ug Leo Reyes.
