BUTUAN CITY – Nagpagawas og advisory ang Department of Health-Center for Health and Development kon DOH-CHD Caraga aron ipahibalo sa tanan ang dugang nga lugar nga nakatala og local transmission sa COVID-19.
Sa maong advisory nga gipirmahan ni regional director Dr. Jose Llacuna Jr., nakalatid nga subay sa ilang gihimong makuting review ug ebalwasyon sa mga kaso sa matag-datus sa Regional Epidemiology and Surveillance ug contact-tracing reports, duna’y mga bag-ong lugar naing rehiyon nga duna’y nagpadayong local transmission.
Sa Agusan del Norte apil niini ang mga lungsod Nasipit, Buenavista, Remedios T. Romualdez kon RTR ug ang Cabadbaran City samtang lungsod sa San Francisco usab sa Agusan del Sur ingon man ang Surigao City.
Alayon niini, upat na ka mga siyudad ug upat usab ka mga lungsod ning rehiyon ang gideklarang duna na’y local transmission sa coronavirus apil na niini ang unang gideklarang Butuan City ug Bislig City.
Nakig-alayon na ang DOH-Caraga sa mga hingtungdang local government units ingon man sa mga national line agencies alang sa himuong pagpangandam higayong mas musaka pa ang ihap sa mga tawong mataptan sa COVID-19 apil na sa himuong testing, quarantine procedures og mas pagpahugot pa sa mga health protocols.
Gila-uman usab sa ahensya nga mas hugtan pa sa mga LGUs ang himuong contact tracing aron matumbok ang mga contacts sa mga positive cases ug magdugang og mga quarantine facilities aron maoy istaran sa matumbok nga mga contacts ug mga suspek.
Tungod niini, gitambagan ang mga residente sa maong mga lugar nga musunod sa mga opisyal ug istriktong ipatuman ang minimum public health standards sama sa pagsuot og face mask, kanunay nga paghugas o kaha pag-sanitize sa mga kamot, pag-obserba sa social distancing ug pagpuyo lang kanunay sa panimalay.
Gi-awhag usab ang tanan nga himuon ang healthy practices apil ang pagkaon sa mga sustansyadong pagkaon ug pagbaton og saktong pahulay.
Gimanduan usab ang tanan nga muduol gilayon sa Barangay Health Emergency Response Team kon BHERT higayong makasinati og mga simtomas sa COVID-19 sama sa ubo, hilanat, harat ang tutunlan, nawalang panglasa ug panimhot ingon man diarrhea alang sa saktong assessment ug management.
