BUTUAN CITY – Muabot sa 11 gikan sa 15 ka mga pasyenteng na-admit karon sa Caraga Regional Hospital sa Surigao City ang nagpositibo sa coronavirus samtang 4 ang pabiling naghulat sa ilang mga resulta sa swab test kondiin sa maong ihap, unom ang anaa sa severe condition.
Sa eksklusibong pakighinabi sa Bombo Radyo Butuan, gipadayag ni Ma. Cecelia Bayana, tigpamaba sa Caraga Regional Hospital, ang gipasalamatan lamang og dako sa mga residente sa maong syudad mao ang taas nga recoveries apan laing gikabalak-an usab kawala nay bakante halos sa mga hospital beds tungod sa daghang mga COVID-19 patients nga na-admit ilabina nga duna na sila’y local transmission.
Sa kasamtangan, wala na’y halos mugawas nga mga residente sa ilang balay ug nihit na usab ang pampublikong transportasyon tungod sa kahadlok sa mga residenteng mataptan sa coronavirus samtang duna na usa’y mga opisina nga nagsira sama sa provincial government ug city hall alang sa himoong disinfection.
Samtang ang Out-Patient Department kon OPD facility usab, temporaryong gihimong extension sa Emergency Room sa maong ospital ug gisuspende na usab sa maong ospital ang pagdawat og mga medical consultation ilabina ning panahon nga nakatala sila sa local transmission.
Gipahimangnuan usab niini ang katawhan sa maong syudad nga kanunay sundon ang mga health protocols sama sa pagsuot sa facemask, faceshield ug perming paghugas sa kamot aron makalikay gikan sa makamatay nga COVID-19.
