BUTUAN CITY – Mismong si Senador Ramon ‘Bong’ Revilla Jr. ang mikumpirma nga fully recovered na siya gikan sa makamatay nga COVID-19.
Sa eksklusibong interview sa Bombo Radyo Philippines kaganinang buntag, gipadayag sa COVID-19 survivor nga padayon pa ang iyang pagpahimsog sa iyang lawas ug gitugutan na usab siya sa iyang doktor nga maka-exercise na apil na ang pag-weight apan kini limitado lang.
Gibalik-lantaw sa senador ang grabe kangil-ad nga iyang naagi-an dihang nataptan sa virus kansa nagsugod matud pa sa sore eyes nga gi-ubanan sa init-init nga gininhawa, hangtud ng gihilantan na rason nga nagpa-swab test gilayon siya ug nakumpirmang duna siya’y coronavirus.
Hangtud nga nabati niya ang kakapoy sa lawas nga daw gisipa-sipa siya og napulo ka mga tawo, labad kaayo ang ulo nga daw duna matud pa’y kuryente ang iyang mga buhok ug mangurog ang iyang lawas ug ngipon kada-kaadlawon.
Giklaro pa sa senador nga kaniadto bilib kaayo siya sa rapid test apan tungod sa nahitabo kaniya dihang nagpositibo na siya sa swab test ug duha ka higayong gisulayan niya ang pagpa-rapid test og nag-negative siya, dinhi na siya nawad-an og pagsalig sa rapid test.
Tambag na lang niini ngadto sa tanan nga kung duna’y masinatiang mga simtomas sa COVID-19, mas maayong mag-isolate gilayon sa kaugalingon aron dili makatakod higayong anaa na sa ilang lawas ang virus ilabina nga duna’y uban nga gitago lang nila ang gihambing simtomas tungod sa kabalaka nga ma-bully sa mga silingan.
