BUTUAN CITY – Padayong nadugangan ang kaso sa Covid-19 sa Caraga lakip na ang natalang patay niini. Sa gipagawas nga taho sa Department of Health kon DOH-Caraga, gikumpirma ni Gerna Manatad, Asst.Regional Director sa buhatan nga 10 ka bag-ong kaso sa covid-19 samtang duha ang nadugang sa listahan sa mga napatay.

 Sa mga nagpositibo, unom niini ang local transmission, usa ang dunay close contact sa local transmission case, 2 ang locally stranded individuals og usa sa Health Care Worker. Sa maong ihap, 8 ang lalaki og 1 babaye diin 18-anyos ang pinakabata samtang sa 57-anyos ang pinakatigulang.

Nagsumikad kini sa Nasipit, Agusan del norte nga dunay usa, sa mga lungsod sa Hinatuan og Lingig sa Surigao Del Sur nga dunay tag-usa samtang 7 sa Butuan City nga gikan sa mga barangay nga Ambago dunay 1; Agusan Pequeño-1; Fort Poyohon-1; Doongan -2; Limaha-1; og Tandang Sora-1. Ang tanang mga bag-ong kaso pulos asymptomatic.

Ang nadugang usab nga patay mao ang 55-anyos nga dunay hypertensive nga nakasinati og hilanat, ubo og pagpanugnaw niadtong Agosto 13. Na-admit kini sa Agosto 15 og nakabsan sa kinabuhi niadtong Setyembre 6.

Samtang ang ikaduha mao ang 63-anyos nga hypertensive og diabetic. Na-admit niadtong Agosto 20 human dunay ubo og lisud nga pag-ginhawa rasong gi-admit sa Agosto 31 ug napatay kagahapong adlawa.

 Sa kasamtangan ang katibuk-ang kaso sa Covid-19 sa Caraga muabot na sa 670 diin 411 ang nakarekober, 241 ang aktibong kaso samtang 18 ang patay..