BUTUAN CITY – Pursigido ang pamilya sa usa ka 14-anyos nga bayong-bayong sa Purok 6, Brgy. Mabua, Surigao City nga kasuhan ang usa ka bayot human kini gi-abuso niadto pang Agusto 17 sa gabii samtang anaa sa usa ka beach resort.
Sa eksklusibong pakighinabi sa Bombo Radyo Butuan ngadto sa uyu-an sa biktima, gibutyag niining bag-uhay lang nila nasayran ang nadangatan sa iyang pag-umangkon tungod sa hulga niini kondiin nagluya na ang biktima nga una nilang namatikdang naglisod paglakaw.
Sa ilang gihimong pakisusi, nasayran nga naka-uban sa biktima ang laing tulo ka mga higalang lalaki og 9 ka mga bayot nga gihanyagan matud pa silang bayran bugti sa pagpagamit kanila apan wala sila misugot.
Dinhi na nangutana ang suspek nga gi-ilang si Delfin Uy kinsa dako matud pa og ranggo sa usa ka government agency sa Surigao City kung kinsa kanila ang makamaong muhilot ug dinhi na napasulod sa cottage ang biktima kondiin dali matud pang gipalong sa suspek ang suga ug posibleng didto na gipa-oral ug anal sex ang biktima.
Tungod sa trauma, duna matud pa’y higayon nga mi-aksyon na paghikog ang biktima gamit ang kutsilyo nga idunggab unta sa iyang tiyan apan na-apsan sa kabanay rason nga hugot nila karong gibantayan.
Nakadugang pa sa problema sa pamilya ang pag-discourage pa kanila sa gidu-ulang policewoman sa Women’s and Children’s Protection Desk tungod kay dako matud pa ang ilang gastuhon kung mupasaka sila og kaso batuk sa suspek.
Subli usab matud pa niyang ipa-medical exam ang biktima tungod kay inay ang samputan ug tutunlan niini ang susihon, gikuhaan naman hinuon kini og blood ukg urine sample nga layo ra sa reklamo sa iyang igsoon nga inahan sa biktima.
