BUTUAN CITY – Misaka na karon sa tulo ang total deaths sa Coronavirus disease 2019 (COVID-19) sa Caraga Region human gitaho sa DOH Center for Health Development- Caraga ang duha ka mga bag-ong namatay.
Sa online press briefing kagabii, gikumpirma usab ni Dr. Jose Llacuna Jr., Regional Director sa DOH-Caraga nga nadungagan og 16 ka mga bag-ong kaso sa sakit ang rehiyon.
Sumala ni Dr. Llacuna, sa 110 ka mga RT-PCR results nga ilang nadawat gikan sa Southern Philippines Medical Center molecular sub-national laboratory ug Northern Mindanao Gene Expert TB Reference Laboratory, 94 niini ang negatibo samtang 16 ang nasutang bag-ong nagpositibo sa COVID-19.
Sa maong ihap, 12 ang gikan sa Butuan City diin 6 niini duna’y close contact sa una nang kumpirmadong kaso, 5 ka additional local transmission cases ug usa ka health care worker nga dunay travel history sa Davao City.
Tulo ang Locally Stranded Individuals (LSIs) nga gikan sa Buenavista, Agusan del Norte; San Francisco, Agusan del Sur ug sa Socorro, Surigao del Norte samtang laing usa usab sa lungsod sa Kitcharao, Agusan del Norte kinsa na-admit sa usa ka ospital ning dakbayan.
Kadaghanan kanila nag-edad og 51 hangtod 80-anyos samtang duna usa’y usa ka bata nga 10 -anyos.
Gidugang ni Dr. Llacuna nga sa 16 ka mga bag-ong kaso, 10 niiini ang asymptomatic, 2 ang mild symptoms, 2 ang moderate to severe ug 2 duha ang severe kinsa mao ang natahong namatay.
Gilangkuban ang duha ka bag-ong patay sa usa ka 30-anyos nga lalaking taga- Butuan City kinsa nakasinati og simtomas sa sakit niadtong Agusto 5, nagpakunsulta adtong Agosto 11 ug gilayong gi-admit sa usa ka private hospital sa susamang adlaw apan namatay human ang upat ka adlaw.
Ikaduha ang usa ka 79- anyos nga babayeng taga Kitcharao, Agusan del Norte nga nasayrang diabetic ug hypertensive kinsa nakasinati og simtomas sa COVID-19 niadtong Agosto 4, ug nagpakusolta niadtong Agosto 11 sa usa ka district hospital ug daling gi-refer sa usa ka private hospital ning syudad apan namatay sa wala pa ang 24-oras gikan sa iyang pagka-admit.
Sa kasamtangan, ang Caraga Region aduna na’y 393 ka mga kumpirmadong positive cases diin sa maong ihap, 304 ang hingpit nang nakarekober rason nga 86 na lang ang aktibong kaso ug tulo na ang namatay.
