BUTUAN CITY – Gitangtang na ning adlawa sa lokal nga kagamhanan sa General Luna, Siargao Island, lalawigan sa Surigao del Norte ang enhanced community quarantine kon temporary complete lockdown sa Barangay Cabitoonan human nagnegatibo ang RT-PCR result sa mga probable cases sa COVID-19 sa maong barangay.
Ang tanang mga pasyenteng gipa-ilalom sa RT-PCR niadtong Lunes, parehong nagnegatibo base na sa pagkumpirma sa DOH surveillance officer kondiin apil ang maong mga resulta sa katapusang batch nga gipagawas sa DOH-Caraga apan wala na gi-anunsyo tungod kay negatibo man.
Sa gihimong contact tracing sa Barangay Cabitoonan, ang ilang gi-target nga testing sa mga tawo apil na niini ang secondary contacts ug random tests, parehong negatibo ang resulta sa gipa-ilawman nilang rapid test ug uban sa negative RT-PCR result, usa ka pruweba nga wala pa’y COVID-19 sa General Luna.
Tungod niini, gipahimangnuan sa lokal nga kagamhanan ang tanang mga indibidwal ug ang ilang mga hingtungdang buhatan kalabot sa rational nga paggamit sa mga rapid tests ilabina niadtong dili angayang mupa-ilalom niini.
Alayon niini, gi-awhag sa LGU ang tanan nilang katawhan nga seryusuhon pagsunod ang minimum health protocols aron makunhuran ang risgo ngadto sa COVID-19 infection sama sa paghimo nang mandatory sa LGU sa pagpasuot og face mask kung mugawas sa balay uban sa ipatuang multa niadtong mga mulapas niini.
Kinahanglan usab nga sundon ang physical distancing, cough etiquette ug kanunayon ang paghugas sa mga kamot ug magpasalamat kanunay sa Ginoo sa nadawat nga mga grasya.
Gi-awhag usab sa lokal ng kagamhanan ang tanan nga magpuyo lang sa balay alang sa kaluwasan sa tanan.
