BUTUAN CITY – Wala’y nakitang foul play ang ginsakpan sa Scene of the Crime Operatives kon SOCO sa kamatayon sa usa ka construction worker nga napalgan na lang nga naglutaw sa Kajima creek sa Brgy. Libertad kagahapon sa alas-7:40 sa buntag kondili mao lamang ang pagkalumos.
Naila ang biktimang si Dionesis Salaum, 35-anyos, residente sa Purok 6, Brgy. Sumile ning siyudad.
Sa ekskluksibong pakighinabi sa Bombo Radyo Butuan, gipadayag ni PLt. Abel Bulawan, tigpamaba sa Butuan City Police Office, kalit na lang mibiya ang biktima gikan sa ka-ubanan niini og inom og milatas sa creek.
Dihang wala na kini makabalik, gipangita na kini sa iyang mga ka-ubanan apan pakyas gihapon sila rason nga gipalabay una nila ang kagabhi-on.
Pagkasunod adlaw kon kagahapon sa buntag, duna’y nakakita sa biktimang naglutaw na sa mismong creek ra gihapon nga una na niyang nahumulan.
