BUTUAN CITY – Usa ug tunga sa oras nga nawad-an og linya sa kuryente ang dakong bahin ning siyudad sa Butuan human gitay-og sa 5.8 magnitude nga linog kaganinang ala-1:32 sa kaadlawon ang lungsod sa Bayabas, lalawigan sa Surigao del Sur.
Ang linog nga tectonic in origin duna’y gilay-ong 21-kilometros sa habagatang bahin sa lungsod sa Bayabas ug duna’y giladmong 40-kilometros.
Tungod niini, nabati ang intensity 4 nga pagtay-og sa maong lungsod apil na sa Bislig City, Tandag City, sa mga lungsod sa Cagwait ug Hinatuan sa nasangpit nga lalawigan apil na dinhi sa dakbayan sa Butuan.
Intensiy 3 usab ang nabati sa Surigao City sa lalawigan sa Surigao del Norte, Gingoog City ug sa mga lungsod sa Magsaysay ug Medina sa lalawigan sa Misamis Oriental.
Intensity 2 usab sa mga lungsod sa Balingasag, Jasaan, Salay, Tagoloan, ug Villanueva apil na sa Cagayan de Oro City nga parehong sakop sa Misamis Oriental samtang intesity 1 usab sa lungsod sa Mambajao sa Camiguin Island. Sa instrumental intensities usab, mitala og intensity 3 ang Bislig City sa Surigao del Sur ug ang Gingoog City sa Misamis Oriental, intensity 2 usab sa Surigao City sa Surigao del Norte ug Cagayan de Oro City apil na sa Palo, Leyte ingon man sa mga lungsod sa Alabel ug Malungon sa Saragani Province.
Intensity 1 usab ang nabati sa Kidapawan City sa Cotabato; Koronadal City ug lungsod sa Tupi sa South Cotabato. Sa pagkakaron, pipila na ka mga aftershocks ang mitay-og sa maong lungsod.
Base sa earthquake bulletin nga gipagawas sa Philippine Institute of Volcanology and Seismology kon PHIVOLCS, dili makamugna og damyos ang ingong niini nga gikusgon sa linog kansa mitala na og pipila ka mga aftershocks.
