BUTUAN CITY – Lima na lang sa 13 ka mga lungsod ug usa ka siyudad sa lalawigan sa Agusan del Sur ang wala pa makatala og COVID-19 positive subay na sa padayong pagsaka sa ihap sa mga nataptan niini samtang padayon ang pagpadala sa Department of Health kon DOH-Caraga og mga swab samples ngadto sa Southern Philippines Medical Center.
Kini mao ang mga lungsod sa Talacogon, San Luis, La Paz, Santa Josefa ug Veruela.
Base sa COVID-19 case update nga gipagawas sa Agusan del Sur Provincial Health Office kagahapon sa alas-singko sa hapon, nakatala na sila og 13 ka mga kumpirmadong kaso kondiin tulo niini anaa sa lungsod sa Prosperidad; duha sa San Francisco ug Sibagat samtang tag-usa usab sa Bayugan CIty ug sa mga lungsod sa Esperanza, Rosario, Bunawan, Trento ug Loreto.
Sa kinatibuk-an, duna na’y 16 ka mga COVID-19 positives ang maong lalawigan apan nakarekober na ang tulo.
Nakatala usab sila og pito ka mga probable cases nga anaa na sa ilang tgsa-tagsa ka quarantine facility kondiin duha niini anaa sa Bayugan City; Prosperidad ug Loreto samtang usa usab ang anaa sa Sibagat.
Mi-abot usab sa 31 ang ilang suspect cases nga parehong naka-quarantine usab sa tagsa-tagsa nila ka gigikanang munisipyo.
