BUTUAN CITY – Andam na ang pambato sa Caraga Region nga si June Cyra Pineda gikan sa lungsod sa Talacogon, Agusan del Sur sa himuong gown competition ugmang adlawa gikan sa alas-dos ngadto na sa alas-kwatro sa hapon subay sa nagpadayong mga pre-pageant competitions nga gihan-ay na alang sa Miss Philippines Earth 2020.
Kini ang unang virtual edition sa Miss Earth Philippines, nga nakasugod nang daan sa ilang preliminary competition kondiin sa pinaka-unang higayon ang winner, virtual nga koronahan aron representahan ang Pilipinas sa Miss Earth 2020.
Ang mapiling winner maoy musunod kang Miss Earth Philippines 2019 Janelle Lazo Tee nga nagrepresentar sa Pilipinas sa Miss Earth 2019.
Mahinumdumang ning mi-aging semana, ang provincial tourism ambassadress sa Agusan del Sur nga si Pineda ang midaog sa Talent competition (dancing category) kondiin gipakita sa mga contestants ang ilang mga skills gikan sa ilang tagsa-tagsa ka panimalay.
Gihimo ang kompetisyon via Zoom meeting platform, kondiin walo ka mga delegates ang nag-perform sa ilang mga dance routines gikan sa ilang tagsa-tagsa ka lokasyon.
Sa maong kategoriya, naka-gold si June Cyra Pineda pinaagi sa iyang modern dance routine samtang naka-silver si Diana Rose Hidalgo gikan sa Allacapan, Cagayan dihang iyang gi-perform ang ‘Tinikling’ samtang bronze usab ang nakuha ni Tsina Jade Chiu gikan sa Iloilo City pinaagi sa iyang hula dance presentation.
