BUTUAN CITY – Tumang kalipay ang gibati ni Roberto Coscos, ang Civilian Volunteers Organization kon CVO member sa Brgy. Cabcabon ning siyudad, tungod kay wala siya magtuo nga ang wala paghatag kaniya og bahin sa Special Amelioration Program kon SAP taliwa nga napulo ka tuig na siyang nagserbisyo sa maong barangay, mao diay ang paagi sa Ginoo aron makapabarog siya og bag-o ug presentableng balay.
Nasayrang human gituki sa Bombo Radyo Butuan ang emosyunal nga kahigwaos ni Coscos human wala malakip sa listahan sa mga SAP beneficiaries taliwa nga frontliner pa siya ning panahon sa COVID-19 pandemic, duha gilayon ka mga overseas Filipino workers kon OFWs pinaagi nila Adelfa Palomar ug Jane Deloraso, ang nagpadala kaniya og kwarta aron iyang mapatukod ang iyang kapuy-an.
Uban sa tabang sa Bombo Radyo Butuan napadala kang Coscos ang kwarta ug sulod lang sa usa ka semana, napabaarig gilayon ang iyang balay nga dali gilayon niyang gibalhinan.
Blessings in disguise matod pa ang wala pagkarga kaniya sa SAP tungod kay sobra pa hinuon ang gihatag kaniya human napalanog sa Bombo Radyo ang iyang istorya.
Hugot ang iyang pasalamat sa Bombo Radyo ug sa tanang mitabang aron mabag-o ang iyang panglantaw sa kinabuhi dayong saad nga mubalik na siya pagsimba tungod kay taud-taud na siyang wala’y simbahay.
