BUTUAN CITY – Temporaryong gisira sa barangay council sugod kagahapong adlawa ang Purok 8 sa Brgy. Canlanipa sakop sa Surigao City sugod human nakumpirmang gikan dinhi ang ika-upat nga kaso sa COVID-19 sa Caraga Region pinaagi sa babayeng medical technologist sa Caraga Regional Hospital nga nakabase sa maong siyudad.
Gikumpirma ni Punong Barangay Joel ‘Jojo’ Cambalon sa eksklusibong pakighinabi sa Bombo Radyo Butuan nga tumong niini nga dili mabalda ang gihimong disinfection nga himuon na unyang kada-adlaw aron ma-contain ang coronavirus kung anaa pa kini sa maong purok.
Migawas usab sa gihimong contact tracing sa mga health authorities nga sa maong lugar, bugtong ang 7-anyos ug 12-anyos nga mga anak sa pasyente ang iya lang nakahugoy-hugoy tungod kay trabaho-balay ra matud pa ang na-andan niini tungod sa kawala nila’y hilig mga mugawas sa ilang balay.
Kini matud pa ang rason nga dihang nakumpirmang positibo kini sa maong sakit, apil nga gi-quarantine karon sa Caraga Regional Hospital diin kini nagtrabaho, ang iyang mga anak.
Saysay pa ni Kapitan Cambalon, naka-uli nang daan sa ilang panimalay ang maong pasyente gikan na-quarantine sulod sa 14 ka mga adlaw adiser pa migawas ang resulta rason nga gibalik kini pagkuha sa ambulansya ug gi-admit na sa maong ospital uban sa pag-isolate usab sa iyang mga anak.
