BUTUAN CITY – Daw nahimong animal sanctuary ang wala’y tawong mga kalsada sa Madrid, Spain human nanggawas ang mga ihalas nga mananap nga gikan sa mga bukid ug mga farms.
Sigon ni Butuanon Bombo international correspondent Ronnel Rosal kinsa atua na sa Madrid, Spain nagpuyo kauban ang iyang pamilya, daw nabati sa mga mananap nga wala nay makadisturbo kanila rason sa ilang pagpanggawas ug sa maong siyudad na nangita og makaon.
Iyang gibutyag sa eksklusibong pakighinabi sa Bombo Radyo Butuan, nga apil matud pa sa nakita ang mga baboy ihalas nga duna pa’y mga baktin samtang ang mga unggoy lingaw pang naglangoy-langoy sa swimming pool.
Gikumpirma usab ni Rosal nga inanay nang giwagtang sa gobyerno ang lockdown pinaagi sa pagpabalik sa ubang trabaho sama sa panday-mason.
Gipa-ambit nalang niini nga tungod sa kadaghan sa mga nataptan sa virus sa Spain, ang mga basketball court gihimo na nga ospital.
Gi-obserba usab ang tag-lima ka metros nga distansiya ugaling musulod sa mga palitanan diin gamiton sa pagbayad ang card ug kanunay ang himoong disinfection.
Gibutyag pa ni Rosal nga suportado sila sa gobyerno sa Espanya ning panahon sa Covid-19 pandemic.
