BUTUAN CITY – Pabiling wala pa’y natalang kaso sa COVID-19 dinhi sa Caraga Region kansa nakumpirma base na sa gipagawas nga situational report no. 41 sa Department of Health-Center for Health and Development kon DOH-CHD Caraga kagahapong adlawa.
Sa maong report migawas nga duna na’y 36 ka mga ‘Patients Under Investigation’ kon PUIs ang rehiyon kondiin 12 kanila ang gi-admit sa managlahing ospital samtang ang nahabiling 24, gipa-ilalom sa istriktong home quarantine.
Base sa PUI tracker, sa 36 nga ihap, siyam niini ang anaa sa Agusan del Sur, tag-pito ang natala sa dakbayan sa Butuan ug sa Surigao del Norte, lima sa Surigao del Sur; tulo sa Surigao City; duha sa Cabadbaran City samtang mitala og tag-usa ang Agusan del Norte, Bislig City ug Tandag City samtang wala sa Dinagat Island province.
Tungod niini, apil sa aksyong gihimo sa ahensya ang paghatag og updates via live streaming sa Caraga Kontra COVID-19 episode 17; pagsalmot sa Regional Development Council Executive Committee meeting; hugot nga pakig-alayon sa Southern Philippines Medical Center alang sa specimen testing; padayong pag-activate sa DOH Operation Center ug istriktong sa mga ‘Persons Under Monitoring’ kon PUMs.
Nag-establisar usab sila og DOH Helpline numbers nga gilangkuban sa 0948-224-1857; 0945-359-2632 ug 085-6546.
