BUTUAN CITY – Nag-atang na ang mga Butuanons ug mga Caraganons sa mamahimong resulta sa America’s Got Talent:The Champions finale nga ipagawas karong buntaga – oras sa Pilipinas
Samtang puno sa paglaum si Anecita Pomoy – inahan ni falsetto singer Marcelito Pomoy kinsa nagpuyo sa Purok 8, Brgy. Ong Yiu ning siyudad sa Butuan, nga kini ang mudaog sa America’s Got Talent: The Champions.
Sa eksklusibong pakighinabi sa Bombo Radyo Butuan, gibutyag ni Anecita nga ang iyang dakong kumpyansa sa abilidad sa iyang anak diha sa pagkanta rason nga kampante siyang mudaog ang iyang anak.
Kini ilabina nga napamatud-an na matud pa kini ni Marcelito sa mga gipang-apilan niining singing contests bisan didto pa sa Bislig City, Surigao del Sur hangtud nga mikampyon kini sa Pilipinas Got Talent.
Nanawagan usab kini sa tanang mga naminaw sa Bombo Radyo Butuan sa tibuok kalibutan nga mubotar pa online sa iyang anak aron matabangan kining makuha ang dungog nga alang usab sa nasud.
Samtang aminado ang inahan nga maglisod na pagbisita kaniya dinhi sa Butuan si Marcelito tungod sa busy niining schedule.
Gani kini matud pa ang hinungdan nga gusto sa singer nga adto na siya mupuyo sa kauluhan aron dali ra niya kining mabisita.
