BUTUAN CITY – Gihulat pa sa kapulisan sa Sibagat, Agusan del Sur ang lakang nga himuon sa kabanay sa magti-ayong namatay human na-angin sa nagrambol nga mga sakyanan pasado alas-6:45 sa buntag sa didto sa Purok 1, Brgy. El Rio, Sibagat, Agusan del Sur.
Naila ang mga biktimang sila Pastor Robert Bibis ug asawa niining si Emilou nga nagtudlo sa Tabon-Tabon Elementary School sa susamang lungsod.
Sa eksklusibong pakighinabi sa Bombo Radyo Butuan, gipadayag ni PMajor Charlie Quidiam – hepe sa Sibagat Municipal Police Station, tungod sa na-usik nga lana sa dapit nga nahitabuan, natumba ang usa ka Canter truck hinungdan nga ang nagsunod niining kolor itom nga Toyota Hi-lux pick-up na-alanganin pag-brake rason sa pagtabok niini sa pikas lane nga miresulta sa pagkalamba niini ngadto sa guard railings.
Nasuta nga ang pick-up, service vehicle sa Department of Public Works and Highways kon DPWH-Agusan del Sur District 2 nga gimanihuan ni Marlo Alaan.
Tungod kay blind curve, wala mabantayi sa magti-ayon ang nalagpot nga pick-up rason sa ilang pagkalamba usab sa passenger side niini.
Dali silang gidala sa ospital apan parehong gideklarang dead-on-arrival sa attending physician.
