BUTUAN CITY – Gikonsiderang bayani ang usa ka pulis nga namatay human mibusikad ang dalang granada sa nagmaoy nga lolo sulod sa kolehiyo sa Initao, Misamis Oriental.
Kini ang gipadayag ni Daisy Joe Bagares Halibas, usa ka residente nga nakasaksi ug nakakuha og video sa maong panghitabo.
Sa eksklusibong pakighinabi sa Bombo Radyo Butuan, gipadayag ni Halibas nga nawad-an sila og maayung pulis human sa kamatayon ni Police Master Sergeant Jason Magno, kinsa gi-ila nilan g bayani tungod kay gawas nga iyang gitaya ang iyang kinabuhi alang sa kaluwasan sa mga estudyante, siya usab maoy kanunay muresponde sa mga matigayong kagubot sa ilang lugar.
Pagkumpirma pa niini nga usa ka Maranao ang suspetsado nga nagmaoy human nga wala gibuhian sa mga personahe sa Department of Environment and Natural Resources kon DENR ang duha niya ka-trakan sa kahoy nga duna’y kargang kahoy nga nadakpan.
Gi-ibtan na matud pa daan og pin ang maong granada didto pa lang sa DENR ug tungod kay tapad lang ang Initao College, didto kini nagmaoy sa school gymnasium.
Daling nakaresponde si Police Master Sergeant Magno ug usa pa niini ka ka-ubanang pulis.
Sa nakuhang video, duna’y criminology instructor nga makitang maoy mi-judo sa suspek rasong nalabay ang granada nga daling gikuha ni Magno aron unta ilabay sa layo na dapit apan mibuto na kini samtang anaa pa sa iyang kamot rason sa pagkaputol sa iyang kamot samtang bungkag usab ang tiyan nga maoy hinungdan sa iyang kamatayon og dinhi na gipusil sa kaubanang pulis ang maong suspetsado.
Samdan sa maong insedente ang 2 ka mga magtutungha nga nalandig karun sa balay-tambalanan.
