BUTUAN CITY – Mukabat sa 220 ka mga pamilya sa Brgy Binucayan, lungsod sa Loreto, Agusan del Sur. ang nanghikling tungod sa kabalaka nga madamay sa sunod-sunod nga engkwentro tali sa militar ug mga rebeldeng New Peoples’ Army kon NPA.
Sigon ni 1Lt Amadeuz Celestial – civil military operations kon CMO officer sa 60th Infantry Battalion, Philippine Army, unang narekober sa operating team ang patay’ng lawas sa usa ka rebelde sa bukirang bahin sa Sitio Union sa maong barangay human ang duha ka oras nga panag-agbat sa Sitio Union sakop sa maong lugar.
Gawas sa patay’ng lawas narekober usab ang usa ka M16 rifle, 15-kilos nga improvised explosive device ug mga subersibong dokumento.
Samtang ang laing usa, nakalas sa gilusad nga pursuit operation sa militar pagkahapon sa susamang adlaw ug apil sa mga narekober ang usa ka M16 armalite rifle, rifle grenade, ammunition ug detonating cord.
Nagpakanaug gilayon og kamanduan sa emergency response team si Loreto Mayor Lorife Magadan-Otaza pag-atiman sa mga nadislokar nga mga residente.
