BUTUAN CITY – Padayong naglaum si Jessa Gros, 25-anyos ka-ipon sa driver sa motorsiklo nga namatay human nabiktima sa hit-and-run ang iyang gimanehuang motorsiklo sa may Macapagal Bridge sa Brgy. Villa Kananga ning siyudad nga unta mutahan na sa iyang kaugalingon ang responsableng driver sa dump truck.
Sa eksklusibong pakighinabi sa Bombo Radyo Butuan, gipadayag ni Gros nga rest day gikan sa trabaho ang iyang ka-ipong si Michael Tabulo, 32-anyos, residente sa Purok 4B, Brgy, Camayahan ning siyudad dihang nahitabo ang insidente.
Giduaw matud pa kini sa iyang mga ka-ubanan sa trabaho nga angkas sa maong motorsiklo nga nailang sila Joven Cagnaan, 31-anyos, minyo, residente sa Brgy. San Roque, Lingig, Surigao del Sur ug Michael Musong, 38-anyos, minyo ug residente sa Purok 4-B, Brgy. Camayahan.
Nanghinaut si Gros nga mutahan na sa iyang kaugalingon ang wala pa mailang responsable aron tubagon ang iyang nahimong salaud nga miresulta sa pagkamatay sa iyang ka-ipon og pagka-ospital usab sa duha ka mga ka-ubanan niini.
Nasayrang naglisod pagtumbok sa plate number sa maong sakyanan ang mga imbestigador sa maong panghitabo tungod kay dili maklaro ang nasusi nilang CCTV footage.
